今晚欧联「死亡B组」开打，英超利物浦主场迎战意甲AC米兰，两队曾经两次喺欧联决赛碰头，同样擦出火花，但今次相隔14年后再喺欧联相遇，双方踢法都有重大转变。「红军」近年踢欧联以守代攻，面对防守严密嘅意甲球队绝少抢攻，首战但求稳中求胜，2.5球入球细值博。

华基尔云迪积克同祖尔麦迪比伤愈回归，「红军」防守力重拾水平，开季4战只失1球。「红军」前线虽然有穆罕默德沙拿同沙迪奥文尼等猛将，但佢哋需要空间发挥速度上优势，喺欧联更讲求防守嘅场合，利物浦仍然会先以防守为先，再伺机反击，佢哋近7场欧联就有6场总入球为2球或以下，加上利物浦近年对意甲球队未见优势，近6次喺欧联同意甲代表交锋，只有2胜1和3负，当中3场「食白果」、5场总入球为2球或以下，今仗随时又冇碇埋手。

AC米兰重返欧联首战望1分

AC米兰今季意甲3战全胜，伊巴谦莫域上场复出即有入球，不过另一前锋基奥特啱啱先从新冠肺炎康复，上阵成疑。AC米兰近7年来再次喺欧联亮相，作客晏菲路梗系唔易踢，预计佢哋会以1分做目标，细盘好路。