挟4连胜强势出击嘅阿根廷今场开波7分钟就打开纪录，美斯传畀拿达路马天尼斯射入，美斯今届赛事已经有5次助攻，刷新个人大赛最多助攻纪录。
根据OPTA统计，美斯全场12次尝试过人，其中9次成功，搞到哥伦比亚球员愈踢愈粗野，疯狂飞刬呢位34岁前锋，结果哥军6张黄牌全部都係因为侵犯美斯拎到，法兰法巴更加踢到美斯足踝受伤流血。61分钟，哥伦比亚终于扳平，效力波图嘅路易斯迪亚斯左路杀入禁区，窄角度射成1比1。阿根廷原本有机会喺法定时间内赢波，但係拿达路马天尼斯射门被对手护空门，美斯转身抽射中柱唔入，保持1比1和局至完场。
由于美洲盃4强不设加时，双方立即以互射12码分胜负，首轮两军主将古达度、美斯都射入。之后成为阿根廷门将达米安马天尼斯表演时间，呢位效力英超球队阿士东维拉嘅钢门扑出达云臣山齐士、耶利文拿、卡当拿嘅射门。虽然有迪保罗宴客，幸好佢嘅阿根廷队友里安度柏利迪斯、拿达路马天尼斯之后都射入，12码赢3比2，总比数赢4比3，继2016年后再次杀入美洲国家盃决赛，亦係自2007年之后，美洲盃决赛再次上演阿根廷对巴西嘅超级戏码。
美斯今届美洲盃已射入4球排射手榜第1位，仲有5次助攻，如果佢可以率领阿根廷喺决赛击败主办国巴西，就好大机会获得今年金球奖及世界足球先生。
