曼联同罗马嘅对决，曾经缔造唔少经典场面，包括2007年欧联8强次回合，当年曼联首回合落后1比2，次回合返奥脱福出现大屠杀，「红魔」大炒罗马7比1，呢场亦係曼联现任主帅苏斯克查嘅欧洲赛告别战，亦都係由呢场计起，「红魔」近6次对住罗马获5胜1和压倒性佳绩。
不过你可能会话，数据係死嘅，都咁多年咩都唔同晒喇。又当你啱，咁就讲近况，两军喺今场前嘅联赛都赢唔到波，但相对嚟讲曼联状态肯定较罗马好，曼联除上场同列斯联打和0比0，对上5场全部赢波，反观罗马就4战不胜，包括啱啱联赛作客2比3不敌排尾4嘅卡利亚里。
曼联係今届欧霸4强当中，唯一一队由欧联降格落嚟嘅球队，相比罗马之前喺欧霸遇到嘅对手级数更高。罗马近8场欧霸得2场可以保持清白之身，作客曼联相信凶多吉少，而且「红魔」主将般奴费南迪斯喺欧霸表现勇勐，连同之前效力士砵亭，30场欧霸上阵贡献17个入波及11次助攻，有佢在阵曼联唔忧冇波入，主胜热得有道理。
